12. Huhezinemak hautatu ditu hamar finalistak!

Aurreko edizioetan bezala, hamar film laburrek osatzen dute Sail Ofiziala. Hauek dira aurtengo hamarrekoa osatzen duten lanak:

  • Gogor atzea (Oier Fuentes) 6’56’’
  • Shell Phone (Miren Mujika) 9’42’’
  • Tximeletaren hegaldia (Amaia San Sebastian) 4’41’’
  • Un agujero en el muro (Carlos Moure) 18’30’’
  • Minutuak (Mikel Uralde Arrue) 9’50’’
  • Zain (Pello Gutierrez) 12’36’’
  • Ama (Josu Martinez) 7’20’’
  • Asfixia (Leire Egaña) 4’40’’
  • Agnès (Irati Elortondo) 7’39’’
  • Ancora lucciole (Maria Elorza) 14’23’’

Deialdi bete film jaso ditugu sail ofizialean, eta lan zaila izan da hamar finalistak hautatzea. Sekula baino euskarazko film gehiago jaso ditugu Huhezinema Euskal Film Laburren 12. edizioan; Sail Ofizialeko hautaketan ere inoiz baino gehiago dira: hamarretik sei film labur dira euskarazkoak. Sail Ofizialean hautatutako hamar lanetatik bost emakume zuzendariek eginak dira, eta beste bostak, gizon zuzendarienak.

Hautaketan Euskal Herrian azken urtean egindakoaren lagin anitza bildu nahi izan dugu. Hauek dira osatu dugun hamarrekoaren ezaugarrietako batzuk: drama da hautatutako film labur gehienak barnebiltzen dituen generoa, hautatutako film laburren artean animaziozko lan bat dago, eta horietatik zazpi finantziazio publikorik gabe eginak dira (Vertigo sarirako hautagaiak). Aurtengo finalisten artean, Ikus entzunezko Komunikazioa Graduko ikasle ohiek zuzendutako hiru film labur daude: Miren Mujikaren Shell Phone, Mikel Uralderen Minutuak eta Irati Elortondoren Agnés.

Apirilaren 5ean Aretxabaletako Arkupe aretoan egingo den sari banaketa ekitaldian, Sail Ofizialean hautatutako hamar filmen egileek jasoko dituzten 200 euroez gain, beste sari hauetakoren bat irabazteko aukera iango dute: Goiena Saria (1.000 euro euskarazko film onenari), Vertigo Saria (400 euro), Ikusleen Saria (300 euro) eta Mundukide Saria (700 euro) hiru sailetan aurkeztutako film laburren artean Giza Eskubideak eta Justizia Sozialaren gaiak egokien txertatuta dituen film labur onenari).

Hamar film labur hauek apirilaren 5ean proiektatuko ditugu Aretxabaletako Arkupe aretoan bertan. Bertan izango dira hautatutako filmen egileetako asko, euren sormen lanak aurkezteko eta ikusleekin partekatzeko; beste hainbat gonbidatu ere bilduko dira Huhezinema jaialdiaren 12. edizioari amaiera biribila emateko.

89 film jaso ditugu Huhezinema jaialdiaren 12. edizioan

Guztira 89 lan aurkeztu dituzte Huhezinema Euskal Film Laburren Jaialdiaren 12. ediziora. Horietatik gehienak, 60 film labur, Sail Ofizialera aurkeztutako lanak dira; antolakuntza taldeak hamar finalistak hautatu beharko ditu ondoren epaimahai ofizialak sariak horien artean banatu ditzan. Azken urtean Euskal Herrian egindakoaren lagin anitza bildu dugu Sail Ofizialera aurkeztu diren lanetan: eskarmentuzko zuzendarien lanak eta hasiberrien filmak, emakumezko eta gizonezko egileen proposamenak, fikziozko filmak, dokumentalak, elkarrizketarik gabeko filmak…

MU Ikasleen Sailera hamaika lan aurkeztu dituzte Mondragon Unibertsitateko ikasleek; bideoklipak, film laburrak eta dokumentalak aurkeztu dituzte ikasleek. Kutixi Sailean, berriz, 18 ikus-entzunezko jaso ditu talde antolatzaileak.

Huhezinema Euskal Film Laburren Jaialdiko programazio lantaldeko kideak.

Lehiaketara aurkeztutako 89 lanetatik 42 dira euskaraz eginak. Horiez gain, Huhezinema Euskal Film Laburren Jaialdiaren 12. edizioan nazioarteko hiru film labur erakutsiko dira. Nazioarteko film labur horiek Donostiako 66. Zinemaldian izan ziren ikusgai, Zinema Ikasleen Nazioarteko XVII. Topaketan. Bertan izan ziren Ikus-entzunezko Komunikazio graduko laugarren mailako bost ikasle; Orona sariaren epaimahaia osatu zuten ikasleek. Ikusitako film horietatik hiru hautatu dituzte Huhezineman erakusteko.

KARTEL LEHIAKETAREN IRABAZLEA

AITZOL ZUBIZARRETAK SORTUTAKO KARTELA IZANGO DA 12. HUHEZINEMAREN JAIALDIAREN IRUDIA

Aitzol Zubizarreta (1998, Santurtzi) Ikus-entzunezko Komunikazioko graduko ikasleak irabazi du 12. Huhezinema Euskal Film Laburren Jaialdia iragartzeko kartel lehiaketa. Guztira, Euskal Herri osotik bidalitako 33 lan jaso ditu epaimahaiak, eta guztiak aztertu ostean, Zubizarretaren kartela hautatu du jaialdia iragarri eta euskarrietarako diseinuak sortzeko. HUHEZIn ikasten hasi zenetik, askotan parte hartu du zinemaren inguruko ekintzetan, eta 11. Huhezineman Kutixi saileko Ikusleen Saria lortu zuten.

Lehiaketarako kartela sortu baino lehen “klaserako kartelen bat edo beste” diseinatu duela dio Zubizarretak, baina “lan serio bat” egin duen lehen aldia hau dela; diseinu lanekin “harreman handirik” ez duen arren, aspalditik ditu gustuko, “sormenarekin eta irudimenarekin lotura zuzena” dutelako. “Umetan marrazketa lehiaketa pare bat” irabazitakoa da Santurtzikoa, baina kartel lehiaketa batean “lehenengoz” hartu du parte.  

Zinemak hamabi hamarkada bete dituela eta 12. Huhezinema dela baliatuta, eta “leloa zinemaren lotuta” dagoenez, zinemaren historian esanguratsuak izan diren “hamabi pertsonaia” hautatu zituen Zubizarretak kartelerako. “Zinemaren historiako pertsonaiarik ezagun eta deigarrienak” zerrendatu, eta hamabi aukeratu zituen: “Ideia hau da: nahiz eta film guztiak ez ezagutu aurpegi eta irudiak ezagunak egingo zaizkio ikusleari. Gainera, ikusleentzat jolas interesgarria izan daiteke denak asmatzen saiatzea”.

Kartel lehiaketara aurkeztutako proposamenetako batzuk ikusgai izango dira Aretxabaletan jaialdiak iraungo duen egunetan. Eskerrik asko parte hartzaile guztiei!

MUNDUKIDE SARIA

BIGARRENEZ, MUNDUKIDE SARIA JASOKO DU GIZA ESKUBIDEAK ETA JUSTIZIA SOZIALA EGOKIEN LANTZEN DITUEN FILMAK

Bigarren urtez, elkarlanean ari dira Mundukide Fundazioa eta Huhezinema Jaialdia. Aurten ere, Mundukide saria jasoko du Giza Eskubideak eta Justizia Soziala erarik egokienean lantzen dituen film laburrak. Irabazleak 700€-ko saria izango du, eta Mundukide Fundazioak antolatutako hiru ekintzatan filma aurkezteko aukera izango du. Film labur irabazlea hautatzeaz epaimahaia arduratuko da; Mundukide Fundazioko kide baten laguntza izango dute horretarako

Duela bi hamarkada sortu zenetik hona, ipar-hego, mendebalde-ekialderen arteko aldeak txikituko dituen garapen eredu baten alde ari da Mundukide Fundazioa. Hegoaldeko herriekin lankidetzan aritzen dira, kooperazio kooperatiboan, baliabideak eta ezagutza partekatuta. Balore horiei buruzko hausnarketak sustatzea da Huhezinema Jaialdiko Mundukide sariaren helburua. 2018ko Huhezinema Jaialdian Amancay Gaztañaga eta Erika Olaizolaren Z U L O film laburrak eskuratu zuen saria; buruhandi baten eta gizaki baten arteko maitasun istorioa kontatzen du filmak.

Z U L O film laburrak jaso zuen 11. Huhezinemako Mundukide Saria.

IREKI DUGU 12. HUHEZINEMAN FILM LABURRAK AURKEZTEKO EPEA

2019ko apirilaren 2tik 5era egingo da 12. Huhezinema Euskal Film Laburren Jaialdia, Aretxabaletako Arkupe kultur etxean. Film laburren jaialdi batek ezinbestean behar ditu film laburrak, eta beraz, ireki dugu jaialdiko hiru sailetara lanak aurkezteko epea. 2019ko otsailaren 15era bitarte, haien lanak bidaltzeko aukera izango dute Euskal Herriko film laburren egileek. www.huhezinema.eus webgunean daude hiru sailetan lanak aurkezteko oinarriak guztien eskura: Sail Ofiziala, MU Ikasleen Saila eta Kutixi Saila.

Hamabigarren edizio honetan, Mondragon Unibertsitateko Ikus-entzunezko Komunikazioko hamasei ikaslek osatzen dute lan talde berria eta Iban del Campo irakaslearen gidaritzapean arituko dira, urtero bezala. Aurten 5.000€ banatuko ditugu sarietan, hiru sail desberdinetan.

Jasotako film labur guztien artean Aukeraketa Batzordeak 10 film labur aukeratuko ditu jaialdiaren Sail Ofiziala​ osatzeko. Hamar hauetako bakoitzak  200€ jasoko ditu hautatua izateagatik. Hamar film hauek, beste lau sari hauen lehian arituko dira:

SAIL OFIZIALA

-Goiena Saria: 1000€ ​ ​(Epaimahai Ofizialak emango du saria). Euskarazko film onena​ sarituko da.

-Mundukide Saria:  700€  (hiru sailetan aurkeztutako film laburren artean Giza Eskubideak eta Justizia Sozialaren gaiak egokien txertatuta dituen film labur onena sarituko du).

-Vertigo Saria​: 400€ ​(Mondragon Unibertsitateko ikasleek osatutako epaimahai batek emango du saria). Diru laguntza publikorik gabe ekoiztutako eta banatutako film laburrik onenak jasoko du.

-Ikusleen Saria​: 300€

MU IKASLEEN SAILA

-Fikzio Onenaren Saria: 300 €

-Dokumental Onenaren Saria: 300 €

-Argazki Onenaren Saria: Ogeita4 enpresak 1.500€an baloratutako kamera ekipamendua utziko dio irabazleari, 2020ko Huhezineman aurkeztuko duen euskarazko film labur bat egiteko.

-Ikusleen Saria: 100 €

KUTIXI SAILA

-Kutixi Saria: 400 €

-Ikusleen saria: 100€

Abian dira Huhezinema jaialdiaren hamabigarren edizioaren prestatze lanak; Euskal Herriko film laburren egile eta zinema sortzaileoi dagokizue orain, zuen lanak bidaltzea. Jasotzeko gogoz da aurtengo lantaldea. Zorte on!

Kartel lehiaketa martxan da!

Kaixo lagunok!

2019ko apirilaren lehen astean egingo da 12. Huhezinema Euskal Film Laburren Jaialdia, Aretxabaletako Arkupe kultur etxean. Ikasturtea hasi eta berehala hasi da aurtengo talde antolatzailea lanean, eta hamabigarren edizioa iragartzeko kartelaren bila ari da. Aurten ere Euskal Herri osoko sortzaileei emango die kartela sortzeko aukera, kartel lehiaketa antolatuta.

Hauek dira kartel lehiaketaren oinarriak.

Kartel lehiaketa.png

Donostiako Zinemaldiko epaimahaikide lanetan aritu dira Mondragon Unibertsitateko ikasleak

Donostiako 66. Zinemaldian izan dira Ikus-entzunezko Komunikazio graduko laugarren mailako bost ikasle, Zinema Ikasleen Nazioarteko XVII. Topaketan. Zuriñe Maguregi koordinatzailearekin batera, Orona sariaren epaimahaia osatu dute ikasleek, eta topaketako film laburrik berritzaileenari Orona Saria (5.000 euro) emateko ardura izan dute. Hautatutako ikasleak Haizea Azpilikueta, Unai Portilla, Irati Vergara, Leire Zarate eta Ane Zuazubiskar izan dira. Epaimahaiak Betzabe Garcia zuzendari mexikarraren “The Girl With Two Heads” film laburra saritu du, “zinemaren historian askotan landu den emakumearen gorputzaren gaia era apurtzailean kontatu duelako, eta teknikoki zein narratiboki berritzailea delako”.

ORONA 1 Karlos Corbella.JPG

Orona sariko epaimahaikideak, Iñigo Marquet Orona Fundazioko garapen zuzendaria eta The Girl With Two Heads filmeko lantaldea. / Karlos Corbella, Donostiako Zinemaldia.

Orona sariaren film irabazlea eta topaketan izan diren beste film labur batzuk Huhezinemara ekarriko ditugu laugarren aldiz, Zinema Ikasleen Nazioarteko Topaketaren eta Huhezinema jaialdiaren arteko lankidetza hitzarmenari esker.

ORONA 2 Betzabe Garcia

Emakumeen gorputzei buruzko narratiba berriak proposatzen ditu The Girl With Two Heads filmak.

Nazioarteko zinema eskola garrantzitsuenetakoetatik Euskal Herrira etorritako ikasleen lanak ikusi eta zinegile berriak ezagutzeko aukera izan dute bost ikasleek; “denbora gutxian asko ikasteko aukera” izan dutela nabarmendu dute ikasleek. Film laburrak ikusteko bakarrik ez, Zinemaldiko sail ofizialeko film luzeak ikusi eta zine zuzendari esanguratsuen master class-etan egoteko aukera izan dute ikasleek. Besteak beste, Peter Strickland eta Albertina Carriren filmak ikusi eta haien hitzaldiak entzun dituzte.

Zinema Ikasleen Nazioarteko Topaketan saritutako film laburren gaineko informazioa lotura honetan aurkituko duzu.

Horrela izan da 11. Huhezinema

Film sarituen emanaldia Ordizian


<p><a href=”https://vimeo.com/225978696″>Areka [Trailer]</a> from <a href=”https://vimeo.com/user12274024″>Kimuak</a&gt; on <a href=”https://vimeo.com”>Vimeo</a&gt;.</p>

Martxoaren 23an amaitu zen 11. Huhezinema Jaialdia, eta hamaika sari eman ondoren, film saritu horien tour txikiarekin hasteko garaia iritsi da… Huhezinema ibiltaria abian da!!

Gaur izango da lehen etapa, Ordiziako Herri Antzokian, arratsaldeko 8.30tatik aurrera. Bertan ikusiko diren filmak hauek dira:

Kutixi Saila

Ikusleen Saria: Entsalada (Julen Higuera)

Basque Culinary Saria: Jan-burgesa (Egoitz Díaz)

MU Ikasleen Saila

Argazki Onenaren Saria (Ogeita4): Marra Gorria (Unai Portilla)

Dokumental Onenaren Saria: Harriz herri (Haizea Azpilikueta)

Fikzio Onenaren Saria eta Ikusleen Saria: Karkarcar (Ibai Zabala)

Sail Ofiziala

Vertigo Saria eta Mundukide Saria: Zulo (Amancay Gaztañaga, Erika Olaizola)

Ikusleen Saria: Aprieta pero raramente ahoga (15′, David Pérez Sañudo)

Goiena Saria: Areka (Atxur animazio taldea)

 

Gaur gaueko saioa aurkezteko eta emanaldiaren ondorengo solasaldian parte hartzeko 3 lagun bialdiko ditugu: Iban del Campo, jaialdiko koordinatailea, Ibai Zabala, “KarKarCar” film laburreko zuzendaria eta Andoni Imaz, film bereko lantaldeko kidea.

 

 

Laburpen hitzak , , ,

Huhezinema 2018, telebista saio berria

Aurtengo jaialdia amaituta, eta oraindik balantzea egiteko astirik izan ez dugunean, Goiena Telebistarekin dugun lankidetzari esker, 2017an egindako telebista saioaren jarraipena izango duen programarako grabaketak egiten ari dira egunotan Goienako lagunak Aretxabaletako fakultatean.

Joan den urteko saioan eskema jarraituz, jaialdiko MU Ikasleen Sailean aurkeztutako lanetan jarriko du arreta telebista  saioak eta filmen egileekin elkarrizketak izango dira filmei sarrera emango dietenak. Formatua zertxobait aldatu da baina ez dugu spoilerrik egingo. Emisioak 2018ko urritik aurrera hastea aurreikusita dago. Hamar saio izango dira guztira.

Oraingoz, atzoko grabaketaren irudi batzuk partekatzen ditugu hemen. Ikus-entzunezko graduko lehen mailako ikasle talde batek MASKARAK film laburra aurkeztu du Huhezineman. Eurentzat lehen esperientzia izan da film labur bat egiten eta bizitako gorabeherak kontatu dituzte kameren aurrean.

Laburpen hitzak , , ,
%d bloggers like this: